Qaraqurumluqlarning « shük » naxshisi !
Nawada siz qar yaghqan künlerde qaraqurum taghlirining ichkirisidiki qoshtagh yézisining ismisla kentidiki yashan'ghan kishilerning öylirige baridighan bolsingiz qedimki zaman uyghurlirining iznasi bolghan « shük » naxshisini angliyalaysiz . Bu yurttiki balilar qar yaghqan künlerde yanchuqlirigha güle - qaq, jigde - yangaq séliwélip moysipitlerni yoqlaydu hem bu boway - momaylarning qélin qargha pürken'gen qishtin aman - ésen ötüwélishini tileydu . Andin ular ochaq yaki meshning etrapigha chöridiship olturup « palani bowam < شۈك > naxshisini éytip bersun » dep chawak chélishidu. Shuning bilen bowaydin biri özini rawurus tüzeshtürüp balilarni kigiz - körpilerde retlik tizilip olturushqa teklib qilidu . Balilar edeb bilen olturup bolghandin kéyin boway hasisini élip balilarning otturisigha chüshidu - de , qiziqarliq heriketler bilen « shük » naxshisini mungluq hem janliq ahanggha sélip oqushqa kirishidu:

Oghuzxanning oghli yoq ,
Shük olturung , shük .
Börexanning boyni yoq ,
Shük olturung , shük .
Böküxanning böki yoq ,
Shük olturung , shük .
Kökmikimning (1) köki yoq ,
Shük olturung , shük .
Oqyayimning oqi yoq ,
Shük olturung , shük .
Qapqanimning qapi yoq ,
Shük olturung , shük .
Taychiqimning puti yoq ,
Shük olturung , shük .
Xaltikamning uni yoq ,
Shük olturung , shük .
Qapiqimning süyi yoq ,
Shük olturung , shük .
Öyge kelsem otun yoq ,
Shük olturung , shük .
Shük olturung , shük .
Bügün kéche xotun yoq ,
Shük olturung , shük .
Englikimning éngi yoq ,
Shük olturung , shük .
Oghliqimning oghli yoq ,
Shük olturung , shük .
Chiraqimning nuri yoq ,
Shük olturung , shük .
Chirayimning chéhri yoq ,
Shük olturung , shük .
Yürekimning pari yoq ,
Shük olturung , shük .
Héch xénimning kari yoq ,
Shük olturung , shük .


Müshikim miyanglaydu ,
Xorizim chillayudu ,
Méning mushu modekem (2) ,
Oquwalimen deydu .
Boway naxshisini oqup eng axirqi misrasigha kelgende balilarning péshanisige söyüp qoyidu , quchaqliship körüshüp bir - birige salam bérishidu , andin bowayning bashlap bérishi bilan balilar « shük » naxshisini ünlük oqushqa bashlaydu . Boway bilen momaylar ussulgha chüshidu . Arqidin balilarmu ussulgha chüshidu . Kün pétishqa az qalghandila balilar öylirige qaytishidu . Bu qaraqurumda talay esirler dawamida saqlinip kelgen balilar oyunidur .