Essalamu’eleykum, dadamning éti nasir, özümning éti qadir. Bir dadidin üch iduq, ölduq, ölduq, kömülduq, üchimizla saq qalduq. Dadimiz bek bay idi,minishliri tay idi, asmandiki ay idi. Égiz taghning baghridin domiliduq yuqirigha, chüshüp kettuq chongqurgha. Bir akam uyan’gha ketti, bir akam buyan’gha ketti. Dadimizdin miras qalghan, qalghinimu bir yalghan, qazi keldi, bölüp qoydi, méni obdan shilip qoydi. Akamlargha chong-chong tegdi, mangize chipar baytal, küye chüshken tor tegdi. Torni aldim, derya boyigha bardim. Tégi tash iken, süyi yoq iken. Deryagha saldim torni, ilindi jiq béliqning burni, béliqni süzüwerdim, noxtilap chigiwerdim. Béliqni pishuray désem qazinim tépilmidi, ochaqqa ésilmidi. Achchiqim nedin keldi, nasiwal alsam chaqcham yoq, bir qazan alay désem yanchuq quruq aqcham yoq. Quruq yanchuqqa qol tiqsam, qolumgha chiqti üch tengge, ikkisi sidam iken, üchilisi kem iken. Bazargha aldirap bardim, üch qazan aldim, ikkisining tégi yoq, birining tüwi yoq. Qazanni ochaqqa assam ot shundaq köyüp ketti, temechmu yoq, yulghunmu yoq, isi asman’gha yetti. Hériptimen, échiptimen, közüm ochuq uxlaptimen. Béliqlarmu piship qaptu, issiq ötmey xamla qaptu. Yédim rasa, semridim taza, ishiklerdin patmidim, tünglüktin özümni tashlidim. Ögizige chiqip qarisam, chipar baytal otlap yürüptu, shota qoyup dikkide, miniwaldim likkide, baytal mangghili unimay yürüp ketti, toxtimay méngip bir saraygha yetti, yer dessimey chüshüwaldim. Özüm chüshüp bolghuche béshim yerge chüshüp kétiptu, chiqmighan shamalda béshim yerdin uchup kétiptu. Béshimni izdep shundaq qarisam, bir bash kéliwétiptu, kélishken bash iken, qapqara qash iken. Yéqin bérip qarisam, tash iken. Méngip, méngip bir sheherge yettim. Sheherde xotunumni körüp qaldim, uni rasa urup saldim. Bazardin tériq aldim, ikki taghargha qachilidim, qanche qilsam tolmidi, aghzini etkili bolmidi. Töshük yanchuqtin töshük aldim, köshüktin köshük aldim. Tériqni köshükke salsam turup qaldi, aghzini himlep qoysam tériq köklep ünüp qaldi. Tériqni artip baytalgha, xotunni egeshtürüp arqamgha, yürüp kettim tarim derya boyigha. Baytilimni toxtitalmidim, bir taqlapla ötüp kettim. Baytilim qéchip ketti, yettisheherdin éship ketti. Baytilimni direklep, u taghqa chiqtim körünmidi, bu taghqa chiqtim körünmidi. Tamdin égiz baghqa chiqtim, körünmidi. Hérip kettim, atni izdep qérip kettim. Chiqiwilip égiz taghning choqqisigha, yer astigha qarap kettim, baytilim körünmidi. Shundaq qarisam, müremde turuptu bir yéngne sanjilip, yéngnini élip uchigha qarisam, baytilim yéngnining uchida otlap yürüptu, yette taghning nérisida, sekkiz taghning bérisida. Qolumni uzitip tutuwaldim, «chuh» désem mangmidi, qamcha ursam mangmidi. Chüshüwélip dikkide, atni kötürüp likkide, taghutashtin halqidim, deryalardin halqidim. Bir qara tash üstide turuptiken bir quzuq, baytilimni baghlidim. Baghlighinim qozuq emes, yawa ghazning boyniken, ghazlar qanat yaymay «ghaq-ghaq» qilip uchup ketti. Oynap bérip, yéqin bérip qarisam, chipar baytal yétip qaptu, bolmisun dep atni haram, yanpishimgha qarap baqsam, ghilipim bar, pichiqim yoq, qolumdila soyiwerdim tulumchilap. Göshni göshchige berdim, töshni töshchige berdim, térisni «püf» dep püwlisem, chipar baytal bir kishnepla turup ketti. Éger toqumay miniwaldim, üzenggini ching dessep, qushqunni ching tutup ildam mangdim, asta mangdim, chaqiliqqa saq-salamet yétiwaldim. Mana bügün ottuz oghul jem boptu, mendek bir lapchi yigit kem boptu, oynanglar, yayranglar, neghme-nawa saz boptu. Xudagha shükür, yoqilip ketken béshimni mushu yerdin tépiwaldim. Qamlashtimu geplirim, laplashtimu geplirim, bilginimni éytiwaldim, ey balilar, anglighan’gha, külgen’ge barikalla, heshqalla!
Calendar
Sun Sep 13 2015, 15:12 by 
Mawzu: 41 Yalghan (ijadi :Xelq , Qelemde : Abliz Muhemmed Sayrami) 