Namsiz Toy

Mawzu: Namsiz Toy Tue Oct 26 2010, 00:41

Nami Yoq Toy ( Esli Mawzu Shundaq )
(Hékaye)
Seid Ehmed [ Özbékistan ]
Eseddula Mexsumning otturanchi oghli Seyfulla tünügün qamaqtin chiqti.
Ishtin kelsem kocha doqmushida besh-alte qoshnam topliship qaptu.
__ Qayaqqa mangdingiz qoshna , derhal nerse-kérekliringizni tashlap chiqing . Mexsum akidin köngül sorap qoyimiz .
Heyran qaldim, néme dep köngül soraymiz? oghli armiyedin, ya birer xeyrlik jaydin kelmigen tursa , némisini soraymiz?
__ aa , bolinge , bille kiripla chiqimiz .
Mehellichilik, eldin qélip bolmaydu. kirduq. Hoylidiki supigha jay raslan'ghan. Ichkiri öyde qariyler. Aywanda Mexsumning yar-buraderliri. birla sorun bosh. pemimche artistlar chaqirilghan bolushi mumkin.
Aldigha pertuq tartilghan ashpezning béshi köründi. Béhi (biye) shéxigha yéngila soyulghan qoy arqa putidin ésip qoyuluptu. Mexsumning qamaqtin chiqqan oghli béshigha yéngi sürme reng doppa kiyip, kelgen-ketkenlerge qol qoshturup yürüptu.
Mana qarang, töt yil közni yumup-achqiche ötüp kétiptu. Mexsumning shu oghli istrahet béghida mest bolup qélip bir balini pichaqlap qoyghan idi. Mexsum terep-teerepke qatrap pichaq yégen balining tonushlirini tapti, ata-anisigha adem qoydi. shundaq qilip balisining tirik qalghinigha shükür qilghan ata dewa qilmaysen, dep oghligha qesem ichirdi. Emma dewager kechken bilen hökümet kechmeydiken. Seyfulla töt yilliq késildi. Mana , shu töt yilmu bir piyale chay ichkiche ötüp ketti.
Ademler tinmay kélishmekte. Quyuq-suyuq ta'amlar tartilip turmaqta.
Desturxan'gha shishiler peyda bolup qaldi. Kech bolghanda konsértni tügitip artistlarmu kélishti. Ular olturghan jayda shire tégidin piyaliler uzitilishqa bashlidi. Yashlar qedeh soqushturup qamaqtin chiqqan balining salametliki üchün ichishke bashlidi.
Sorun ewjige chiqti. Sel keyp bolghanlarning awazi kötürülüshke bashlidi. Qamaqtin chiqqan bala özi oyun'gha chüshti.
Kéyinki chaghlarda toy-tökünlerde nutuq sözleydighanlar peyda bolushqan idi. Bu yighilishmu hem shularsiz ötmidi.
Chéchini östürüwalghan bir yigit rumka kötürüp otturigha chüshti. Heyran boldum, u néme démekchidu? Toy bolghan bolsighu qiz-yigitni tebrikleridi , tughulghan kün chéyi bolghan bolsighu uzun ömür tilep tebrikler bolghiydi , emma birawni pichaqlap qamaqtin kelgenning chéyida némiler tebriklinishi mumkin ?
__ Hürmetlik buraderler , mana bu tewerrúk öyning tewerrük desturxanida olturuptimiz. Hemmingizlerge melum, Tashkentte qattiq yer tewridi, bazarliq komitétqa qarashliq mehellimizmu buzghunchiliqqa uchridi. Shuning üchün démekchimenki, eziz buradirimiz Mexsumkamning arzuliqi bolmish Seyfulla bazirimizning weyran bolghan mehellilirini qayta qurushqa öz töhpisini qoshidu, "dégen ümidtebiz. Bu qedehni Seyfullaning salametlikige kötürüshüngizlerni soraymen.
Ichidighanlar jarang-jurung qedeh soqushturdi, ichishti. herqaysisi Seyfullani yénigha chaqiriship alahide-alahide qedeh tutushti. mey séghin'ghan bolsa kérek, yaq , déyishni untup uzatqanni élip yutuwerdi. Ash tartilghiche Seyfulla qamaqqa kétishtin burunqi haligha kélip andin rumkini qoydi.
__ Qamaqqa dégen yigitning güli chüshidu . ish bilidighan adem her yerde nénini tépip yeleydu.
u yerdimu bashliq bolup yürdük , he , dostlar ...
U deldengship, geptin ézip dégidek hali bilen hoylini aylinip yürdi. Birdinla mehelle komitétining re'isige közi chüshüp qaldi. Yénigha kélip qoolirini bélige tirep turdi. Ésimde qélishiche saqchi idariside Seyfullaning exlaqi toghrisida soralghanda u toghrisini yézip bergen idi. Mana shu ish Seyfullaning ésidin chiqmighan iken :
__ heyy , qolingdin hemme ishi kelmidighu __ dep turushigha mehelle yigitliri Seyfullani sirtqa achiqip kétishti. Biz qoshnilarmu ornimizdin turduq, chiqip kétishtuq.

Mana shu weqe bir aydin ashti. Seyfulla gep yémeydighan shox bala bolghachqa, yazliq kinoxanining yénida bir juwan'gha érining aldida shilting étip qoyuptu, töt adem guwahliq bérip, saqchigha apirishiptu.
Emdi qarighanda uni yene besh yilda körüdighan oxshaymiz ...