Hesh-pesh dégüche dostum Batur Rozi dilimgha salghan judaliq zarigha 1135 kün ötüp kétiptu , emma uning ashu jesurane siymasi xatiremde hélihem yéngi péti saqlinip turmaqta. Bügün , yeni miladiye 2010-yil 5-ayning 7-küni u qoshnam Hijran Fransowadin Fransuz tili öginishni bashlighan kün idi, buningghimu hesh-pesh dégüche sap-saq 8 yil (2002-yil 5-ayning 7-küni) bolup qaptu. Uning bilen 1994-yil 5-ayning 7-küni tonushqan idim.uningdin menggü ayrilghili 1135 kün bolup qaptu , mushu künde uni eslep qelbimni yene birmunche judaliq pighani qapliwaldi. hayattiki 7-mayni untup kétey désemmu shu küni seherde u daim chüshümge kiridu. bu chüshte bezide uning bilen arilash bille bolup qalidighan Qarghaliqtiki aka aghiynimiz Qawul Sawur , Imin Niyaz, bezide küychimiz Zahir Burhan , bezide eyni chaghdiki ini aghiyne xizmetdishim Enwer Abdullah , bezide bolsa aka aghiynimiz merhum Esqer Hüseyin we bezide xoshnam Hijran Fransowa arilash chüshümge kirip manga menggü untush pursiti bérishmeydu. Belkim bu büyük Lushün ependi éytqan << Untush Üchün Eslesh >> bolsa kérek ? Bu chüshni 1135 kündin burunmu her 7-may seherde körüp turattim , gerche chüshümning waqeliki oxshash bolmisimu emma u daim chüshümning bash pérsunaji idi. belkim bu dostumning toyumda manga qoldash bolup nurghun ishlarni jayida béjiriwétip , Zahir Burhan küy yangritidighan réstoran'gha toyumni shappur-shuppur orunlashturup manga birmunche asanliq tughdurup bergenliki bekrek tesir qilghanliqidin bolsa kérek.
U xoshnam Hijran Fransowaning inisi Nurmuhemmedjan bilen newre baja chiqip qalsa bolidu. u qiran chaglar idi, xoshnam Hijran Fransowa , men , bu dostum Batur Rozi pat-patla sorun tüzep ichip qoyattuq, shundaq sorunning biride Hijran Fransowaning inisi Nurmuhemmedjan temburgha (merhum tembur padshahi Nurmuhemmed Tursun emes jumu )bir jan kirgüzüwidi, Batur Rozi dutarni tengkesh qilimen, dep turuwélip méni öyümge bir barghuzghan idi, bumu del 7-may küni idi-yu, bir réalliq idi.u shu sorunda özining newre bajisi Nurmuhemmedjan bilen tonushuqan we qewet xushal bolup ketken, sel jiqraqmu ichip qoyghan, shu keypchilikte Hijran Fransowadin Fransuz tili öginimen, dep turuwaldi. Hijran Fransowamu keypchilikte bundaq dost hem urugh - tughqan üchün heqsiz ders béridighanliqini wede qildi. men Baturning sergerdan-musapiretchilikke mejbur hayati bilen Fransuz tili öginelmeydighanliqini éytip << boldi >> qiliwétishni éytsam, u dostane nesihetlirimge qesem bilen étraz bildürüp, dunyadiki eng büyük edebiyat sahibi bolghan Fransuz tilini choqum öginidighanliqini, shu yillarda Fransiyede Mopassanning téxi élan qilinmighan Fantaziyelik qolyazma hékayiliri toplimini Fransuz tilida oqup chiqidighanliqini éytti. démisimu u etisidin bashlap Hijran Fransowadin Fransuz tili öginishke kirishipla ketti. heptisige bir botulka mey , üch saet waqt biz üchimizge hemrah . biz bolsaq Fransuz tili we Fransuz edebiyati heqqide detalashlar qilattuq, elwette detalashlirimiz Fransiye Owghéniye ölkisining merkizi Kleghmongfiyghang (Cllermontferrand)shehiridiki Paskal uniwérsitetida analiz ximiyisi doktoriliq uniwani alghan, edebiyat heweskari Hijran Fransowa teripidin testiqlinatti yaki ret qilinatti...
Omumen, 7-may seherdiki chüsh 16 yildin béri toxtap qalmidi. Dostum Batur Rozi bu jahanning qiyamitidin jaq toyup jennet makan bolghili 1135 kün bolghandimu tekrarliniwerdi. ulugh jümede rohi dua telep qildimikin ? yaki perzentlirini, dostlirini séghinip qaldimikin ?
Bu nameki , yazdim qelemim tartip til,
Tarixin tekrar chüshning yettinchi may bil.
Künning reqemini ulugh azna qilghil ,
Ikki mingdin ötüp érdi mana saq on yil.
Calendar
Sun Sep 13 2015, 15:12 by 
Mawzu: 7-maydiki tekrar chüshler! 