Jallap Bilen Jalap

Mawzu: Jallap Bilen Jalap Tue Oct 26 2010, 01:07

Ghelite chüsh körüshke adetlinip qalghan Aynigar muellim bügün yene ishxanidiki birnechche pitne sen'etkarlirigha kéche körgen chüshini sözlep bergili turdi , bundaq chüshlerning anglighuchiliki bolmisimu emma qulaqqa paxta tiqiwélishning orni yoq ...

___ qaranglar , chüshümde érim Idiris özining xéli yillar burun ölüp ketken bir yurtdishining hékayisini sözlep bergen idi , shundaq éniq ésimde qaptu, uning dep bergenlirini silerge sözlep bérey .Aridin 25 yil ötken bolsimu yurtimizda yüzbergen Imirning pajielik toyini zadila untuyalmaymen , xuddi Shwédsiyelik Ékspéditsiyichi Séwin Hédin Teklimakanda ezrail changgilidin qutulghanda mozdozni untuyalmay xet yézip teshekkürini bildürginidek, ashu pajielik kéchini zadila untuyalmaymen...Towa deymen, ademlerdiki pitne sen'iti shu derijide tereqqiy qilghanki, birawning xushalliqini nabut qilish derijisige bérip yetken. Ajiz bendiler bundaq sen'etning qiyamet keltürgüchi séhriy qudritige berdashliq bérelmeydiken. Imirning toyi bolghan axshimi men yene birnechche dostlar hujrighiche ekirip qoyghan iduq hem u yerde azraqtin ichiship , ulargha bext tilep qaytqan iduq. Shu dostlar arisida türlük qarashtikiler bolsimu emma menla Imirgha heqiqiy bext tiligen idim . arimizdin birnechchisi dérize marilaymiz, dep qélishti.
___ bir jallap* bilen bir jalap toy qilsa taza qamlashmaydu , Imir yung-tére sétiwalghili kétip sirtlarda turup qalsa söngek ghajilashqa kön'gen qanjuq jim yatsunmu ? ___ dédi Nemet galwang .Shu chaghda Arif taz :
___ hoy galwang , bulargha bash qaturalighidek bolghan’gha qarighanda kallang xéli ishleydighan bolup qaptu - he . bizler Imirning dostliri bolghandikin köz-qulaq bolup qoyumiz , ___ dep set hijaydi.
___ emise senmu dérize marighili qalsang boptiken , Imirning karamitini körüp puxadin chiqiwalghan bolatting , ___ dédi Yasin paxtek. Yasin paxtek buni galwanggha qaritip dédimu yaki tazgha qaritip dédimu bir nerse dégili bolmaytti, emma hemmeylen paraqqide külüshken bolduq. Parangmu jimidi…
Aridin hepte ötkende Imir bilen uning xotuni Muyesser Hujrisida ölüptu, dégen xewerni yurtluqlargha Tahir tatliq tarqatti. Héchkim uning gépige ishenmigen idi, emma yenila ishinidighanlar öz közi bilen körüp bizge xewer qilghanda biz peqet uning miyit namizighila ülgürduq. Eslide dérize marilaydighan showikeshler yéngi er-xotunlarning kariwattiki hünirini körüp tamasha qilimiz , dep qalghanlirida , qiz chiqmighan Muyesser bilen Imirning köngülsizliklirini körüp qélip , etisidin bashlap pitne qamchisini qarsilditip << Muyesser nimkesh qizken >> dégen geplerni tarqitiwétishken idi. Bu pitniler kocha-koylarda külkige tutruq bolup bérip, axir bazardiki jallaplar , pokanchilar , qassaplar, baqqallar , charbazarchilar arisida pur ketti. Buningdin xorluq hés qilghan Imir Muyesserni boghuzliwétip , özinimu boghuzliwalghan idi. Mana bu pajie doppamchilik nahiye bazirida pitne sen’etkarlirining karamiti bilen biraqla tarqilip ketti. Shuningdin béri bu ish zadila kallamdin chiqmaydu … anglisam , yurtimizda shu ishtin kéyin dérize marilaydighan showikeshler qalmighanmish , bumu bir hésabta yaxshi boptu. Pitne sen’etchilirige sehne hazirlap béridighan showikeshler eslidimu nacharlardin bolup yétilip chiqatti …
___ del shu yerge kelgende érim méni oyghitiwetti , axirida némilerni sözler bolghiydikin ?

* Jallap : tére-tersek , yung qatarliqlarni élip - satquchi tijaretchi .