Hayat Telqinliridin

Mawzu: Hayat Telqinliridin Thu Oct 28 2010, 12:01

Apettur özgining rizqini yémek,
Birining biride qalmastur, démek.
Megerkim jahan’gha xoja bolsangmu,
Yégining halalmu? Oylishing kérek.

Xojanggha küchüktek erkilep ketme,
Özgining baghida segidep ketme.
Her loqma yégining ejringdin bolsun,
Haramgha düm chüshüp petilep ketme.

Yaz kétip pesilning kelgende qishi,
Shu yazgha tartiship munglinar kishi.
Kün-ayni ötküzüp telpünüsh bilen,
Quruydu tuydurmay yürek béghishi.

Qulaq sal néme der elning danishi,
Elni dep ötkenning aghrimas béshi.
Tarixning darigha ésilghay bir kün,
El-yurtni qaqshitip jan baqqan kishi.

El köngli bir déngiz, shawqunsiz déme,
Ne qilsam kötürer ün-tinsiz déme.
Peqetla sen üchün tughulmas quyash,
Ömrüngni ötüdu héch tünsiz déme.

Meyli qil iltija ya ümid gahi,
Sangila baqmaydu pelekning rayi.
Ötkünchi dewrge bolsangmu san’ghun,
We lékin qowminggha bolmighin asiy.

Herkimge muqeddes tughulghan weten,
Wetendin ayrilsang kiygining képen.
Quy xushbuy sharabing ichey bir qedeh,
Wetenning ishqida yansun bu beden.

Bolsimu bu jahan seyligah siyaq,
Emestur héch kishi ghussidin yiraq.
Bulbulmu sayrapla ötmes jahandin,
Chüshenseng sangimu hayat ashundaq.

Özüngla ötemsen shahane yashap,
Bu ana tupraqning yilikin shorap?
Yadingda bolmisa el-yurtning ghémi,
Qanchilik bay bolghin u nölge hésab.

Qolningmu pakizi sudila emes,
Ni qol bar bir ömür haramdin kelmes.
Beziler qalsimu sekratqa chüshüp,
Könglidin ketmeydu haramgha hewes.

Mawzu: Re: Hayat Telqinliridin Fri Oct 29 2010, 10:46

Her janning özgiche bolidu ghémi,
Jahandin kim ghemsiz ötüptu qéni?
Ghem, shadliq xakidin yaralghan insan,
Riyazet deshtidin tapar bextini.

Awamning derdige bolghin hemnepes,
Nam-shöhret textige qilmighin hewes.
Dunyani bir waraq aq qeghez déseng,
Sen unda yaxshi qur qaldurghin pewes.

Mawzu: Re: Hayat Telqinliridin Thu Nov 11 2010, 21:47

Eqilsiz dostungdin düshmining zérek,
U da’im eqildin béridu dérek.
Özüngge körünmes ajizliqingni,
Körsitip béridu bolup bir eynek.

Méwisiz bolsimu kérektur térek,
Chöldiki tashnimu déme bikérek,
Xesningmu qimmiti gahida altun __
Dep biler yiraqni közligen zérek.

Mawzu: Re: Hayat Telqinliridin Sun Nov 14 2010, 13:50

Éghizda ni ötkel, dawandin ashtuq,
Müshkülge duch kelsek tayduq, adashtuq.
Derixa, put-qoldin ketkende maghdur,
Pushayman ilkide saqal siylashtuq.

Dostungni muhebbet-neprette sina,
Muhimi derdu-ghem, külpette sina.
Pul-méling barida «way» dégen dostni,
Béshinggha xestelik yetkende sina.

Mawzu: Re: Hayat Telqinliridin Sun Nov 14 2010, 13:58

Birawgha yélinmay küchüngni xar qil,
U birle bir ishchan dilberni yar qil.
Méhnetkesh atangning ümidi hem shu,
Her mehel tirmiship yoqungni bar qil.

Merdlerche at sélip qilalisang jeng,
Éger bash müshkülmu bolsa iradeng.
Bügünni bosh qoyma etengni kütüp,
Échilsun poreklep xush puraq laleng.

Jan zati ezeldin hayatqa qanmas,
Ömürning chirighi qaytilap yanmas.
Meyli kim tartishsun hayat méhrige,
Sa’iti toshqanda ketmekliki rast.

Toplighan bisating menggülük emes,
Qalidu bir küni toxtisa nepes.
Heqqi bar tuz bérip östürgen elning,
Béxilliq chölige qilmighin hewes.

Mawzu: Re: Hayat Telqinliridin Sun Nov 14 2010, 14:05

Bextlik yaralghan insan men déme,
Teringsiz shaxlarda körünmes méwe.
Tut este, shundaq bir heqiqet barki,
Tupraqta méhnetsiz ünmes héchnéme.

Kemsitme mejruhni u quchsa sherep,
El anga yangratsa alqish hessilep.
Özüngchu, béjirim-saghlam ten turup,
Nelerde yürüysen ténep-temtirep?

Ghussidin ademning qatqanda béshi,
Xop bolur yénida bolsa dilkishi.
Hal-munggha yarimas hemmila adem,
Tögining mazarda ne bolur ishi?

Ne hasil ger insan bolsa tileksiz,
(tileksiz insan u bolur kéreksiz).
Kötürgin qeddingni tilektin yol ach,
Qay qoghun oxshighan tersiz-péleksiz?

Tizimlatqan Waqti : 2010-10-22

Heyyam rubaiyliridin qelishmaydiken emesmu?