Elqut ( Yazghuchilar Munbiridin)
1

Chöje qüsh yétilip atalghan enqa,

Taramlar qoshulsa hasili derya.

El ichi hamini altun textimiz,

Ün chiqmas chawaktin turghanda yekta.

2

Xelqim déngizdur men bir bélijan,

Déngizdin ayrilsam bolurmen nimjan.

Hayatim , mamatim bir anga taliq,

Bexti hem pexrichün tesedduq bu jan.

3

Özüngni sham , seher méhnette kördüng,

Ornungni el ara ülpette kördüng.

Teyyar tap , layghezel bolsang nawada,

Kününgni yoqsulluq , külpette kördüng.

4

Qilmighin el rizqi-haramgha hewes,

Haram u – yüzüngni yer qilidu , bes.

Pak bolghin hayatta- gélinggha ching bol,

Shundila bir ömür basmas séni nes.

5

Paniy dunya qonalghu , bir qonupla ötimiz,

Izimizdin gül üner ching chigilse potimiz.

‹‹qandaq bolsa tedbiring , shundaq bolar teqdiring››,

Sherepke ya lenetke bashlar wijdan sotimiz.

6

Méhmanning izziti bir yutum chay , bes,

Hergizmu at , töge soyush shert emes.

Méhmanni chong bilish aqilning ishi,

Chéqilghan köngülni élip bolmaq tes.

7

Meyxumar hamini qawaqta öler,

Yundixor lalma it yalaqta öler.

Ezeldin qil sighmas heqiyqet haman:

Yemchükke ögen’gen qarmaqta öler.

8

Hayat bir tügüchtur yeshmiking qiyin,

Nadanning qarni toq, qelbi ach-zirin.

Ezeldin qil sighmas heqiyqet shuki:

Nadan’gha bilimning nerxi bir tiyin.

9

Bu hayat rahette hordaqxanidur,

Tümen xil reng tolghan boyaqxanidur.

Azghiship urdungmu bir chékit xata,

Axirqi menziling solaqxanidur.

10

Yep kelgen ezeldin halwini hékim,

Tayaq we toqmaqning igisi yétim

‹‹qil sighmas heqiyqet ››deydu birawlar,

Oylisam achchiqqa tolidu ichim .